கச்சியப்ப சிவாச்சாரியாரின் கந்தபுராணத்தில் பழனியாண்டவன் வரலாறு இடம்பெற்றுள்ளதா? (கந்தபுராண நுட்பங்கள்):

வேத வியாசர் வடமொழியில் அருளியுள்ள பதினெண் புராணங்களுள் அளவில் மிகப்பெரியது ஸ்காந்த புராணம். 7 காண்டங்களாகவும் எண்ணிறந்த சம்ஹிதைகளாகவும் தொகுக்கப் பெற்றுள்ள ஸ்காந்தபுராணத்தில், சங்கர சம்ஹிதையின் சிவரகசிய கண்டத்திலுள்ள முதல் ஆறு பகுதிகளை மட்டுமே நம் கச்சியப்ப சிவாச்சாரியார், முருகப் பெருமானின் கட்டளையினை ஏற்றுத் தமிழ்மொழியில் இயற்றி அளித்துள்ளார். 

கச்சியப்பர் அருளியுள்ள கந்தபுராண நூல் சூர சம்ஹார நிகழ்வினையொட்டியதாக அமைக்கப் பெற்றிருப்பதால், அதன் 6 காண்டங்களிலும், முருகப் பெருமான் சிவஞானப் பழத்திற்காக புரிந்த திருவிளையாடலும், அதன் தொடர்ச்சியாய்க் கோபமுற்றுப் பழனி மலை மீது எழுந்தருளிய அற்புத நிகழ்வும் குறிக்கப் பெறவில்லை. 

எனினும் 15ஆம் நூற்றாண்டில் தோன்றிய பரம குருநாதரான நம் அருணகிரிப் பெருமான் எண்ணிறந்த திருப்புகழ் திருப்பாடல்களில் இவ்வரிய நிகழ்வினைப் போற்றிப் பரவியுள்ளார். 

'புடவிக்கணி துகில்' என்று துவங்கும் பழனித் திருப்புகழின் பின்வரும் திருப்பாடல் வரிகளில், 'ஆறுமுகக் கடவுள் உலகங்கள் யாவையையும் நொடிப்பொழுதில் வலம்வந்து சேர, சிவபெருமானோ அச்சிவஞானப் பழத்தினை வேழ முகத்துக் கடவுளான நம் விநாயகப் பெருமானுக்கு அளித்தருள, பரம்பொருளாகிய அச்சிவ மூர்த்தி வருந்துமாறு, சிவஞான வடிவினனாகிய நம் கந்தப் பெருமான் வெகுண்டெழுந்து; சிவகிரி எனும் பெயருடைய பழனி மலையின் மீது எழுந்தருளிய, உணர்தற்கரிய திருவிளையாடலை' அருணகிரியார் உளமுருகிப் போற்றுகின்றார்
-
படியிற் பெருமித தகவுயர் செம்பொன் 
     கிரியைத் தனிவலம் வரஅரன்அந்தப்
          பலனைக் கரிமுகன் வசமருளும் பொற்பதனாலே
-
பரன்வெட்கிடஉள மிகவும் வெகுண்டக்
     கனியைத் தரவிலையென அருள் செந்தில் 
          பழநிச் சிவகிரி தனிலுறை கந்தப் பெருமாளே.