அம்பிகை இடபாகம் பெற்ற திருத்தலம் (கந்தபுராண நுட்பங்கள்):

உமையன்னை, தனை விடுத்துச் சிவமூர்த்தியை மட்டுமே வலம் வந்து வழிபடும் நோன்புடைய பிருங்கி முனிவரின் செயலினைச் சிந்தித்து, 'இனி எனை ஆளுடைய இறைவரின் இடபாகத்தினைச் சேர்வேன்' என்று திருவுள்ளத்தில் சங்கல்பித்து, இமயமலையிலுள்ள திருக்கேதாரம் எனும் திருத்தலத்தில் முறைமையாக 'கேதார கௌரி' விரதமிருந்து; வழிபாடு புரிந்து பேறு பெற்ற நிகழ்வினைப் பின்வரும் திருப்பாடலில் கச்சியப்ப சிவாச்சாரியார் பதிவு செய்கின்றார்,  
-
(உற்பத்தி காண்டம்: வழிநடைப் படலம் - திருப்பாடல் 3):
தன்னை நீக்கியே சூழ்வுறும் தவமுடைப் பிருங்கி
உன்னி நாடிய மறைகளின் முடிவினை உணரா
என்னை ஆளுடையான்இடம் சேர்வன் என்றிமையக்
கன்னி பூசனை செய்த கேதாரமுன் கண்டான்