கந்தபுராணச் சிறப்பு:

10,345 திருப்பாடல்களைக் கொண்ட கந்தபுராண மாகாவியத்தின் இறுதியில், புராண ஆசிரியரான கச்சியப்ப சிவாச்சாரியாரின் கூற்றுகளாக இடம்பெற்றுள்ள இரு திருப்பாடல்களை இப்பதிவில் சிந்தித்து மகிழ்வோம்,

அடியவனை ஆட்கொண்டருளிய நாயகனும், விண்ணுளோர் யாவர்க்கும் நாயகனும், 'தெய்வயானை' எனும் திருநாமமுடைய தேவியின் நாயகனும், ரிக்; யஜுர்; சாம அதர்வண வேதங்களாகிய நான்மறைகளின் நாயகனும், வேடர்குலத் தோன்றலான வள்ளி தேவியின் நாயகனும், சிவஞான வேலேந்தும் ஒப்புவமையற்ற நாயகனுமான குமாரப் பெருங்கடவுளின் அவதார நிகழ்வுகளை விரித்துரைக்கும் இப்புராணத்தினை, புராணங்கள் யாவினுக்கும் தலைமைப் புராணமெனக் கொண்டு போற்றுங்கள், 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 265)
என்நாயகன் விண்ணவர் நாயகன் யானை நாமம்
மின்நாயகன் நான்மறை நாயகன் வேடர் நங்கை
தன்நாயகன் வேல் தனிநாயகன் தன்புராணம்
நன்நாயகமாம் எனக்கொள்க இஞ்ஞாலமெல்லாம்

வற்றாத திருவருள் புரிந்தருளும் முருகப் பெருமானின் இப்புராணத்தினைப் பிறர்க்கு எடுத்துரைப்போரும், இதன் திருப்பாடல்களிலுள்ள உண்மைப்பொருளை முனைந்து ஆராய்ந்திடுவோரும், குற்றமில்லாது கற்றறிபவர்களும், கற்றுக் கொள்ள முயற்சி மேற்கொள்பவர்களும், உளமுருகிக் கேட்போரும் சிவமுத்திப் பேற்றினைப் பெற்று இன்புறுவர், 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 266)
வற்றா அருள்சேர் குமரேசன் வண்காதை தன்னைச்
சொற்றாரும் ஆராய்ந்திடுவாரும் துகளுறாமே
கற்றாரும் கற்பான் முயல்வாரும் கசிந்து கேட்கல்
உற்றாரும் வீடுநெறிப் பாலின் உறுவர் அன்றே