வள்ளி தெய்வயானை தேவியர்க்கிடையில் முருகப் பெருமானின் பொருட்டு விவாதமா? (திரைக்கதையும்; புராண நிகழ்வுகளும்):

1967ஆம் ஆண்டு வெளிவந்த 'கந்தன் கருணை' திரைப்படத்தில் திரைக்கதை சுவாரஸ்யத்திற்காக, 'முருகப் பெருமான் - வள்ளி தேவி திருமண நிகழ்வினை' வீரவாகு வாயிலாக தெய்வயானையார் அறிந்து கோபமுறுவது போலவும், பின்னர் முருகப் பெருமான் சமாதானம் புரிவது போலவும் காட்சி அமைக்கப் பெற்றிருக்கும். மூலநூலான கந்தபுராண நிகழ்வுகளை அறிந்திராமல் இத்திரைப்படக் காட்சியினைப் பார்ப்போர்க்கு, 'இம்முறையிலேயே சம்பவங்கள் நடந்தேறியுள்ளது போலும்' என்று தோன்றி விடுவது இயல்பே. இனி நடந்தேறிய மெய் வரலாற்றினை நம் கச்சியப்ப சிவாச்சாரியாரின் திருப்பாடல்கள் வழிநின்று உணர்ந்து தெளிவுறுவோம்,

(1)
வள்ளியம்மை திருமண நிகழ்விற்குப் பின்னர் முருகப் பெருமான் தேவியோடு கந்தமலைக்குச் செல்கின்றார். அங்கு நம் வள்ளியம்மை தெய்வயானையாரின் திருவடிகளில் முதற்கண் வீழ்ந்து வணங்குகின்றாள், தெய்வயானை தேவியும் (எவரென்று அறியுமுன்னரே) 'தனியேயிருந்த எனக்குத் தக்கதொரு தோழியாய் வந்துள்ளாய்' என்று முதலில் தோழியாய் அங்கீகரிக்கின்றாள். 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 235)
ஆங்கது காலை வள்ளி அமரர்கோன் அளித்த பாவை
பூங்கழல் வணக்கம் செய்யப் பொருக்கென எடுத்துப் புல்லி
ஈங்கொரு தமியளாகி இருந்திடுவேனுக்(கு) இன்றோர்
பாங்கி வந்துற்றவாறு நன்றெனப் பரிவு கூர்ந்தாள்

(2)
பின்னர் தெய்வயானையார் வள்ளிதேவியின் வரலாறு குறித்து கூறியருளுமாறு முருகப் பெருமானிடம் விண்ணப்பிக்க, கந்தப் பெருமானும் 'முற்பிறவியில் அவ்விரு தேவியரும் திருமாலின் திருக்கண்களினின்றும் தோன்றி தன்னை அடைய தவம் புரிந்த நிகழ்வில் துவங்கி, வள்ளி தேவியை மணம் புரிந்தருளியது வரையிலான நிகழ்வுகளை அருளிச் செய்கின்றான். இதன் பின்னர் வள்ளிதேவி மீண்டுமொரு முறை மூத்த சகோதரியான தெய்வயானையாரின் திருவடிகளில் வீழ்ந்து நெகிழ்கின்றாள். தெய்வயானையாரும் வள்ளிதேவியை அணைத்தெடுத்து 'உன்னைத் தங்கையெனப் பெற்ற எனக்கு இனிப் பெறுவதற்குப் பிறிதொன்றும் உளவோ' என்று இச்சமயத்தில் சகோதரியாகவும் அங்கீகரிக்கின்றாள். 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 254)
வன்திறல் குறவர் பாவை மற்றிது புகன்று தௌவை
தன்திருப்பதங்கள் தம்மைத் தாழ்தலும் எடுத்துப் புல்லி
இன்றுனைத் துணையாப் பெற்றேன் எம்பிரான் அருளும் பெற்றேன்
ஒன்றெனக்கரியதுண்டோ உளந்தனில் சிறந்ததென்றாள்

(3)
இதன் பின்னரும் கச்சியப்ப சிவாச்சாரியார் ஐயத்திற்குச் சிறிதும் இடமின்றி பின்வரும் மற்றொரு திருப்பாடலில், 'இரு தேவியரும் எவ்வித வேற்றுமையுமின்றி, மிக்க அன்புடன்; உள்ளம்; உயிர்; புரியும் செயல்கள் ஆகிய யாவற்றிலும் ஒன்றியிருந்து, மணமும் மலரும் போன்று ஒருமையுற்று இருக்கின்றனர்' என்று பதிவு செய்து போற்றுகின்றார்,
-
(தக்ஷ காண்டம்: வள்ளியம்மை திருமணப் படலம் - திருப்பாடல் 255) 
இந்திரன் அருளும் மாதும் எயினர்தம் மாதும் இவ்வா(று)
அந்தரம் சிறிதுமின்றி அன்புடன் அளவளாவிச்
சிந்தையும் உயிரும் செய்யுஞ் செயற்கையும் சிறப்பும்ஒன்றாக்
கந்தமும் மலரும் போலக் கலந்து வேறின்றி உற்றார்
-
(சொற்பொருள்: அந்தரம் - பேதம்; வேற்றுமை)

ஆதலின் வள்ளியம்மை; தெய்வயானையார் திருமண நிகழ்வுகளை உலகியல் கண் கொண்டு பார்க்காமல், கச்சியப்ப சிவாச்சாரியார் உணர்த்தியுள்ள அருளியல் நோக்கினை ஆய்ந்துணர்ந்து தெளிவுறுதல் வேண்டும். வள்ளி நாயகியை இச்சா சக்தியாகவும்; தெய்வயானையாரைக் கிரியா சக்தியாகவும் கொண்டு நம் வேலாயுதப் பெருங்கடவுள் தானே ஞானசக்தியாக விளங்கி யாவர்க்கும் சிவமுத்திப் பேற்றினை அளித்து அருள் புரிகின்றான்.  

(தக்ஷ காண்டம்: வள்ளியம்மை திருமணப் படலம் - திருப்பாடல் 261)
ஆறிரு தடந்தோள் வாழ்க அறுமுகம் வாழ்க வெற்பைக்
கூறுசெய் தனிவேல் வாழ்க குக்குடம் வாழ்க செவ்வேள்
ஏறிய மஞ்ஞை வாழ்க யானைதன் அணங்கு வாழ்க
மாறிலா வள்ளி வாழ்க வாழ்கசீர் அடியார் எல்லாம்