(குறிப்பு: கீழ்க்குறித்துள்ள திருப்பாடல்கள் பாராயணம் புரிவதற்கு ஏற்ற வகையில், தேவைப்படும் இடத்தில் மட்டுமே பதம் பிரிக்கப் பெற்று, நிறுத்தக் குறிகளுடனும் தொகுக்கப் பெற்றுள்ளது)
(திருப்பாடல் 23)
தெய்வத் திருமலைச் செங்கோட்டில் வாழும் செழுஞ்சுடரே,
வை வைத்த வேற்படை வானவனே, மறவேன் உனைநான்,
ஐவர்க்(கு)இடம் பெறக் கால்இரண்டோட்டி அதில்இரண்டு
கைவைத்த வீடு குலையுமுன்னே வந்து காத்தருளே
(திருப்பாடல் 36)
சுழித்தோடும் ஆற்றின் பெருக்கானது செல்வம் துன்பம்இன்பம்
கழித்தோடுகின்றது எக்காலம் நெஞ்சே? கரிக்கோட்டு முத்தைக்
கொழித்தோடு காவிரிச் செங்கோடன் என்கிலை, குன்றம்எட்டும்
கிழித்தோடு வேல்என்கிலை, எங்ஙனே முத்தி கிட்டுவதே?
(திருப்பாடல் 70)
விழிக்குத் துணை திருமென்மலர்ப் பாதங்கள், மெய்ம்மை குன்றா
மொழிக்குத் துணை முருகாஎனு(ம்) நாமங்கள், முன்புசெய்த
பழிக்குத் துணைஅவன் பன்னிரு தோளும், பயந்த தனி
வழிக்குத் துணை வடிவேலும் செங்கோடன் மயூரமுமே
(திருப்பாடல் 72)
சேந்தனைக் கந்தனைச் செங்கோட்டு வெற்பனைச் செஞ்சுடர்வேல்
வேந்தனைச் செந்தமிழ் நூல்விரித்தோனை விளங்குவள்ளி
காந்தனைக் கந்தக் கடம்பனைக் கார்மயில் வாகனனைச்
சாந்துணைப் போது மறவாதவர்க்(கு) ஒரு தாழ்வில்லையே
(திருப்பாடல் 90)
மாலோன் மருகனை; மன்றாடி மைந்தனை; வானவர்க்கு
மேலான தேவனை; மெய்ஞ்ஞான தெய்வத்தை; மேதினியில்
சேலார் வயற்பொழில் செங்கோடனைச் சென்று கண்டுதொழ
நாலாயிரம்கண் படைத்திலனேஅந்த நான்முகனே
(திருப்பாடல் 91)
கருமான் மருகனைச் செம்மான் மகளைக் களவுகொண்டு
வரும் ஆகுலவனைச், சேவற்கைக் கோளனை, வானம்உய்யப்
பொருமா வினைச்செற்ற போர் வேலனைக், கன்னிப் பூகமுடன்
தருமா மருவு செங்கோடனை வாழ்த்துகை சாலநன்றே
(திருப்பாடல் 97)
சேலில் திகழ்வயல் செங்கோடை வெற்பன் செழுங்கலபி
ஆலித்(து) அநந்தன் பணாமுடி தாக்க, அதிர்ந்ததிர்ந்து
காலில் கிடப்பன மாணிக்க ராசியும் காசினியைப்
பாலிக்கு(ம்) மாயனும் சக்ராயுதமும் பணிலமுமே
(திருப்பாடல் 104)
செங்கேழடுத்த சினவடிவேலும் திருமுகமும்
பங்கே நிரைத்தநற் பன்னிரு தோளும் பதுமமலர்க்
கொங்கே தரளம் சொரியும் செங்கோடைக் குமரனென
எங்கே நினைப்பினும் அங்கேயென் முன் வந்(து) எதிர்நிற்பனே
No comments:
Post a Comment