அருணகிரிநாதர் (கும்பகோணத்தில் அருளிய ஷேத்திரக்கோவை திருப்புகழ்)

தேவார மூவரும் சிவபெருமான் எழுந்தருளியுள்ள பல்வேறு ஷேத்திரங்களைப் பட்டியலிட்டுத் திருப்பதிகங்களை அருளிச் செய்துள்ளனர் (இவ்வகையான பனுவல்களை ஷேத்திரக்கோவை என்று குறிப்பர்). இப்பாமாலைகளில் நேரடியாய்ப் பாடல் பெற்றுள்ள பிரதானத் திருத்தலங்களும், இன்னபிற வைப்புத் தலங்களும் இடம்பெறும்) 

திருப்புகழ் வேந்தரான நம் அருணகிரிப் பெருமானாரும் இவ்வகையான ஷேத்திரக்கோவை ஒன்றினை கும்பகோணத்தில் அருளிச் செய்துள்ளார். இதன் இறுதியில், 'இவ்வுலகில் உள்ள ஆலயங்கள் யாவிலும் (அவை எம்மதத்து ஆலயமாக இருப்பினும்) எழுந்தருளி இருப்பவன் சிவசுவரூபியான நம் அறுமுகக் கடவுளே' என்று உறுதிபடப் புகல்கின்றார் ('உலகெங்கும் மேவிய தேவாலயம் தொறு பெருமாளே'). 
 *
இனி இப்பதிவில் ஷேத்திரக்கோவை திருப்புகழைச் சிந்தித்து மகிழ்வோம்,

தந்த தானன தானான தந்தன
     தந்த தானன தானான தந்தன
          தந்த தானன தானான தந்தன ...தனதான

கும்பகோணமொடாரூர் சிதம்பரம்
     உம்பர் வாழ்வுறு சீகாழி நின்றிடு
          கொன்றை வேணியர் மாயூரமம்பெறு ...சிவகாசி

-
(பிரதானத் தலங்கள்: கும்பகோணம், திருவாரூர், சிதம்பரம், சீகாழி, மாயூரம்)
(வைப்புத் தலங்கள்: பாண்டிநாட்டுத் தலமான சிவகாசி என்று கொள்வது ஏற்புடையது)

கொந்துலாவிய ராமேசுரம்; தனி
     வந்து பூஜைசெய் நால்வேத தந்திரர்
          கும்பு கூடிய வேளூர்; பரங்கிரி ...தனில்வாழ்வே
-

(பிரதானத் தலங்கள்: இராமேஸ்வரம், புள்ளிருக்குவேளூர் எனும் வைத்தீஸ்வரன் கோயில், திருப்பரங்குன்றம்)

செம்புகேசுரம் ஆடானை இன்புறு
     செந்தில்ஏடகம்; வாழ் சோலையங்கிரி
          தென்றல் மாகிரி; நாடாள வந்தவ ...செகநாதம் 

-
(பிரதானத் தலங்கள்: ஜம்புகேஸ்வரம் எனும் திருவானைக்கா, திருவாடானை, திருச்செந்தூர், திருவேடகம், பழமுதிர்ச்சோலை, தென்றலின் பிறப்பிடமான பொதிய மலை)
(வைப்புத் தலங்கள்: சக்தி பீட ஷேத்திரமான பூரி ஜகந்நாதர் திருக்கோயில்)

செஞ்சொல் ஏரக மாஆவினன்குடி
     குன்றுதோறுடன் மூதூர் விரிஞ்சைநல்
          செம்பொன் மேனிய சோணாடு வஞ்சியில் ...வருதேவே

-
(பிரதானத் தலங்கள்: திருவேரகம் எனும் சுவாமிமலை, பழனிமலை அடிவாரத்திலுள்ள திருஆவினன்குடி, குன்றுதோறாடல், மூதூர் எனும் திருப்புனவாயில், திருவிரிஞ்சை, சோழ நாட்டிலுள்ள வஞ்சி எனும் கருவூர்)

கம்பை மாவடி மீதேய சுந்தர
     கம்புலாவிய காவேரி !சங்கமு
          கம் சிராமலை வாழ்தேவ தந்திர ...வயலூரா
-

(பிரதானத் தலங்கள்: கச்சி ஏகம்பத்திலுள்ள மாவடி முருகன் சன்னிதி, சிராமலை எனும் திருச்சிராப்பள்ளி, வயலூர்)
(வைப்புத் தலங்கள்: - காவேரி சங்கமமாகும் பூம்புகாரிலுள்ள பல்லவனீச்சுரம், சாயாவனம்)

கந்த மேவிய போரூர் நடம்புரி
     தென்சிவாயமு(ம்) மேயாய் அகம்படு
          கண்டியூர்வரு சாமீ கடம்பணி ...மணிமார்பா
-

(பிரதானத் தலங்கள்: திருப்போரூர், தென் சிவாயமெனும் வாட்போக்கி, திருக்கண்டியூர்)

எம்பிரானொடு வாதாடு மங்கையர்
     உம்பர் வாணி பொனீள்மால் சவுந்தரி
          எந்த நாள்தொறும் ஏர்பாக நின்றுறு ...துதியோதும்

இந்திராணி தன் மாதோடு நன்குற
     மங்கை மானையு(ம்) மாலாய் !மணந்துல
          கெங்கு மேவிய தேவாலயம் தொறு ...பெருமாளே.