கந்தர் அனுபூதியில் திருச்செங்கோடு:

அருணகிரிப் பெருமான் கந்தர் அனுபூதியை விநாயக வணக்கத் திருப்பாடலோடு துவங்கி, 51 திருப்பாடல்களால் ஆறுமுகக் கடவுளைப் போற்றிப் பரவியுள்ளார். 

சில வலைத்தளங்களில் (1 + 101) திருப்பாடல்கள் காணப் பெறினும், சிவத்திரு. தணிகைமணி அவர்கள் 'உருவாய் அருவாய்' எனும் 51ஆம் திருப்பாடலுக்கு மேற்பட்டவை அருணகிரியார் திருவாக்கன்று என்று தெளிவுறுத்தியுள்ளார். 
 
இத்தொகுப்பின் 51 திருப்பாடல்களில், 'நாகசலம்' எனும் திருச்செங்கோட்டுத் தலம் மட்டுமே 11ஆம் திருப்பாடலில் குறிக்கப் பெற்றுள்ளது, ஏனைய 50 திருப்பாடல்களும் தலக் குறிப்புகள் ஏதுமின்றிப் பொதுப் பாடல்களாகவே அமைந்துள்ளன. 

(கந்தர் அனுபூதி - திருப்பாடல் 11)
கூகா என என்கிளை கூடிஅழப்
போகா வகை மெய்பொருள் பேசியவா;
நாகாசல வேலவ, நாலுகவித்
தியாகா, சுரலோக சிகாமணியே!