எடுத்த காரியத்தில் வெற்றி பெற வைக்கும் திருத்தணித் திருப்புகழ்:

சிவத்திரு. தணிகைமணி செங்கல்வராயப் பிள்ளை அவர்கள் பின்வரும் திருப்பாடலை 'காரிய சித்தி நல்கும் தந்திரப் பாடலென்றும், வீர ஜெயத் திருப்புகழென்றும், அணுகுண்டுக்கும் மேலான பேராற்றல் பொருந்தியதென்றும்' போற்றுகின்றார். 

திருப்புகழ் திருப்பாடல்களை அனுதினமும் பக்தியோடு ஓதுவோர்க்கு இடர் புரிபவரை, அத்திருப்புகழே நெருப்பென நின்று அழித்து விடும்' என்று அருணகிரிப் பெருமான் இத்திருப்பாடலில் அறுதியிடுகின்றார். 

தனத்தன தனத்தம் தனத்தன தனத்தம்
     தனத்தன தனத்தம் ....தனதான

சினத்தவர் முடிக்கும் பகைத்தவர் குடிக்கும் 
     செகுத்தவர் உயிர்க்கும் ....சினமாகச்

சிரிப்பவர் தமக்கும் பழிப்பவர் தமக்கும்
     திருப்புகழ் நெருப்பென்றறிவோம் யாம்

நினைத்ததும் அளிக்கும் மனத்தையும் உருக்கும்
     நிசிக்கரு அறுக்கும் ....பிறவாமல்

நெருப்பையும் எரிக்கும் பொருப்பையும் மிடிக்கும்
     நிறைப் புகழுரைக்கும் ....செயல் தாராய்

தனத்தன தனத்தம் திமித்திமி திமித்திம் 
     தகுத்தகு தகுத்தம் ....தனபேரி

தடுட்டுடு டுடுட்டுண்டெனத் துடி முழக்கும் 
     தளத்துடன் நடக்கும் ....கொடுசூரர்

சினத்தையும் உடல் சங்கரித்த மலைமுற்றும் 
     சிரித்தெரி கொளுத்தும் ....கதிர்வேலா

தினைக்கிரி குறப்பெண் தனத்தினில் சுகித்தெண்
     திருத்தணி இருக்கும் ....பெருமாளே.