கந்தமலையில் வள்ளியம்மை; தெய்வயானையார் சந்திப்பு (கந்தபுராண நுட்பங்கள்):

அறுமுகப் பெருமான் வள்ளிதேவியை மணந்தருளிய பின்னர் தேவியுடன் திருத்தணியில் சிறிது காலம் எழுந்தருளியிருந்துப் பின்னர் கந்தமலைக்குச் செல்கின்றான். திருவாயிலில் பூதகணத்தினர் வணங்கிப் போற்ற, தெய்வயானை தேவி வாழும் கோயிலுக்குள் எழுந்தருளிச் செல்கின்றான். வரவேற்றுப் பணியும் தேவியைத் தழுவியருள் புரிந்து அம்மையின் பிரிவுத் துயரைப் போக்குகின்றான். 

(1)
வள்ளிதேவி தெய்வயானையாரின் திருவடிகளை வணங்க, இந்திரனின் வளர்ப்பு மகளாரும் வள்ளிதேவியை விரைந்து அணைத்தெடுத்து, 'தனியேயிருந்த எனக்கு இவ்விடத்தில் தக்கதோர் தோழியென வந்தாய் - நல்லது' என்று கருணை புரிகின்றாள். 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 235)
ஆங்கது காலை வள்ளி அமரர்கோன் அளித்த பாவை
பூங்கழல் வணக்கம் செய்யப் பொருக்கென எடுத்துப் புல்லி
ஈங்கொரு தமியளாகி இருந்திடுவேனுக்(கு) இன்றோர்
பாங்கி வந்துற்றவாறு நன்றெனப் பரிவு கூர்ந்தாள்

பின்னர் கந்தவேளிடம் 'ஐயனே, வள்ளியாகிய இவள் இவ்விடம் வருகை புரிந்த வரலாற்றினை கூறியருள்வீர்' என்று விண்ணப்பிக்க, முருகக் கடவுளும் முன்னர் திருமாலின் திருக்கண்களினின்றும் தோன்றிய அவ்விரு தேவியரின் வரலாற்றில் துவங்கி, தினைப்புனத்தில் தான் வள்ளியை மணம் புரிந்தருளிய நிகழ்வு வரையிலும் விவரமாக அருளிச் செய்கின்றான்.  

(2)
வேலவனின் திருவாக்கினால் தன்னுடைய வரலாற்றினை அறியப் பெறும் வள்ளியம்மை தமக்கையான தெய்வயானை தேவியாரின் திருவடிகளில் மீண்டுமொரு முறை வீழ்ந்து வணங்கி, 'முற்பிறப்பிலும் உனக்கு தங்கையாகத் தோன்றினேன், இப்பிறப்பிலும் உனக்கு இளையவளாகி இன்றுனை வந்தடைந்தேன், என்னைக் காத்தருள்வாய்' என்று நெகிழ்கின்றாள், 
-
(தக்ஷ காண்டம்: வள்ளியம்மை திருமணப் படலம் - திருப்பாடல் 253)
மேதகும் எயினர் பாவை விண்ணுலகுடைய நங்கை
ஓதுசொல் வினவி மேனாள் உனக்கியான் தங்கையாகும்
ஈதொரு தன்மையன்றி இம்மையும் இளையளானேன்
ஆதலின் உய்ந்தேன் நின்னை அடைந்தனன் அளித்தி என்றாள்

(3)
தெய்வயானை அம்மை தன் திருவடிகளில் வீழ்ந்திருந்த வள்ளிதேவியை எடுத்தணைத்து, 'இன்றுனைத் தங்கையெனப் பெற்றேன், அத்துடன் எம்பெருமானின் பேரருளும் பெற்றுள்ள எனக்குப் பெறத்தக்கது பிறிதொன்றும் உளதோ?' என்று நெகிழ்ந்து அருள் புரிகின்றாள்,
-
(தக்ஷ காண்டம்: வள்ளியம்மை திருமணப் படலம் - திருப்பாடல் 254)
வன்திறல் குறவர் பாவை மற்றிது புகன்று தௌவை
தன்திருப்பதங்கள் தம்மைத் தாழ்தலும் எடுத்துப் புல்லி
இன்றுனைத் துணையாப் பெற்றேன் எம்பிரான் அருளும் பெற்றேன்
ஒன்றெனக்கரியதுண்டோ உளந்தனில் சிறந்ததென்றாள்